ប្រែសម្រួល៖ស-សម្បត្តិ
ទីក្រុងម៉ូស្គូ៖ ប្រទេសចិនត្រៀមខ្លួនដើម្បីដើរតួ “ស្ថាបនា” ក្នុងការបញ្ចប់ជម្លោះនៅអ៊ុយក្រែន ប៉ុន្តេនឹងគាំទ្ររុស្ស៊ីក្នុងការការពារ “ផលប្រយោជន៍” របស់ខ្លួន អ្នកការទូតជាន់ខ្ពស់ វ៉ាង យី បានប្រាប់ប្រព័ន្ធផ្សព្វផ្សាយរដ្ឋរុស្ស៊ី ក្នុងបទសម្ភាសន៍ដែលបានចេញផ្សាយកាលពីថ្ងៃអង្គារ (ថ្ងៃទី១ ខែមេសា)។
ទីក្រុងម៉ូស្គូ និងប៉េកាំងបានពង្រឹងកិច្ចសហប្រតិបត្តិការនយោបាយ យោធា និងសេដ្ឋកិច្ចចាប់តាំងពីរុស្ស៊ីបញ្ជាឱ្យធ្វើប្រតិបត្តិការយោធាពេញលេញលើអ៊ុយក្រែននៅខែកុម្ភៈ ឆ្នាំ២០២២។
លោក វ៉ាង ស្ថិតនៅទីក្រុងម៉ូស្គូ និងបានជួបសហការីរុស្ស៊ីរបស់គាត់ លោក សែរហ្គេ ឡាវរូវ សម្រាប់ការចរចាកាលពីថ្ងៃអង្គារ។ គាត់ក៏នឹងជួបប្រធានាធិបតី វ្លាឌីមៀរ ពូទីន ក្នុងអំឡុងពេលទស្សនកិច្ចនេះផងដែរ ដូចដែលក្រឹមឡាំងបានឱ្យដឹង។
“ប្រទេសចិនត្រៀមខ្លួន ដោយគិតគូរពីបំណងប្រាថ្នារបស់ភាគីពាក់ព័ន្ធ ដើម្បីដើរតួស្ថាបនាក្នុងការដោះស្រាយ (ជម្លោះ)” គាត់បានប្រាប់ទីភ្នាក់ងារព័ត៌មាន RIA Novosti។
នៅពេលចាប់ផ្តើមកិច្ចចរចាជាមួយលោក ឡាវរូវ លោក វ៉ាង បាននិយាយថា “យើងនឹងធ្វើការរួមគ្នាដើម្បីចូលរួមចំណែកថ្មីៗដល់បុព្វហេតុនៃសន្តិភាព និងការអភិវឌ្ឍសម្រាប់មនុស្សជាតិ។”
ទាំងគាត់និងលោក ឡាវរូវ បានសរសើរពីទំនាក់ទំនងដ៏រឹងមាំរវាងប្រទេសទាំងពីរ ដោយលោក វ៉ាង បាននិយាយថា “កិច្ចសហប្រតិបត្តិការគ្រប់ជ្រុងជ្រោយ” របស់ពួកគេនឹងនាំពួកគេទៅកាន់ “ដំណាក់កាលថ្មី”។
លោក ឡាវរូវ បានប្រាប់លោក វ៉ាង ថា “អរគុណដល់មេដឹកនាំទាំងពីររូប (ទំនាក់ទំនង) បានឈានដល់កម្រិតមួយដែលមិនធ្លាប់មានពីមុនមក ហើយបន្តអភិវឌ្ឍយ៉ាងសកម្មនៅគ្រប់វិស័យ”។
ប្រទេសចិនបង្ហាញខ្លួនឯងថាជាភាគីអព្យាក្រឹតក្នុងជម្លោះ និងនិយាយថាខ្លួនមិនបានផ្តល់ជំនួយដែលអាចបង្កឱ្យមានការស្លាប់ទៅភាគីណាមួយទេ ខុសពីសហរដ្ឋអាមេរិក និងប្រទេសលោកខាងលិចផ្សេងទៀត។
ប៉ុន្តែចិនគឺជាសម្ព័ន្ធមិត្តនយោបាយ និងសេដ្ឋកិច្ចដ៏ជិតស្និទ្ធរបស់រុស្ស៊ី ហើយសមាជិកអង្គការណាតូបានចាត់ទុកប៉េកាំងថាជា “អ្នកជំរុញដ៏សំខាន់” នៃប្រតិបត្តិការរបស់ម៉ូស្គូ – ដែលខ្លួនមិនដែលថ្កោលទោសនោះទេ។
ប្រធានាធិបតីសហរដ្ឋអាមេរិក ដូណាល់ ត្រាំ បានជំរុញឱ្យមានការបញ្ចប់ជម្លោះដែលមានរយៈពេលជាងបីឆ្នាំនេះតាំងពីចូលកាន់តំណែង ប៉ុន្តែរដ្ឋាភិបាលរបស់គាត់មិនទាន់ទទួលបានការរីកចម្រើនណាមួយនៅឡើយទេ ទោះបីមានការចរចាជាមួយភាគីទាំងសងខាងក៏ដោយ។
លោក ពូទីន បានបដិសេធផែនការរួមរបស់សហរដ្ឋអាមេរិក-អ៊ុយក្រែនសម្រាប់ការបញ្ឈប់បាញ់រយៈពេល ៣០ ថ្ងៃ ហើយកាលពីខែមុនបានស្នើឱ្យដកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ចេញពីតំណែងជាផ្នែកមួយនៃដំណើរការសន្តិភាព៕
ប្រភព៖ AFP/rc
